2013-11-12

دور گئدک




آی تانریمنان بخشش اولان قیسمتیم

یاری گئرچک یاری یالان قیسمتیم

وارلیغیمدا مسکن سالان قیسمتیم

واخ یئتیشدی وصال یئتدی دور گئده ک

گول چیچه یه بورونوبدو گؤی چمن

چکیلیبدی یولوموزدان گول صنم

بو دونیادا خوشبخت لری سن و من

وصال گلدی بیزه یئتدی دور گئده ک

قلبیمیزده ایلک سئوگی نین ناخیشی وار

ایستی سی وار سویوغو وار یاغیشی وار

عؤمروموزون هم ائنیشی یوخوشو وار

سئون کس لر نئجه گئتدی دور گئده ک

گوندوز هر گون گئجه سینه قاریشیر

سانیرسان کی دایانمادان یاریشیر  

بو حیات دا فرصت بیزه یاراشیر

آرامیزدان هجران ایتدی دور گئده ک

عؤمور آزدی یاماننان اوزابلق

یاخشی سیلا زیروه لره اوجالاق

آرزوم بودور سئوه – سئوه قوجالاق

قوشا دئیک عؤمور گئتدی دور گئده ک

قلبیمیزده ایلک سئوگی نین ناخیشی وار

ایستی سی وار سویوغو وار یاغیشی وار

عؤمروموزون هم ائنیشی یوخوشو وار
سئون کس لر نئجه گئتدی دور گئده ک 
 اوخویان : نازپری دوستعلی اوا
*

2013-11-09

آغارما ساچیم



آرزو سون سوز ، عؤمور یاری
آرتدی آلین قیریشلاری
سن ده انصاف اولسون باری
آغارما ساچیم آغارما
عؤمور کئچیر یامان کئچیر
قلبیمدن قارا قان کئچیر
داها گؤزل لر یان کئچیر
آغارما ساچیم آغارما  
داش دیر قلبین داش دیر جانین
یوخدور دویقون یوخدور قانین
هله گئنجم سن ویجدانین
آغارما ساچیم آغارما
نه ارکن سن الدن دوشدون
نییه دوشدون نه دن دوشدون
نئینیم جلوه دن دوشدون
آغارما ساچیم آغارما
منی غمگین گؤرسه اگر
دشمن گولر دوست غم یئیه ر 
قیزلار باخیب دایی دئیه ر
آغارما ساچیم آغارما
هله سه سیم اوجالماییب
ائل گوجوندن گوج آلماییب
هله اوره ک قوجالماییب
آغارما ساچیم آغارما
*
اوخویان : محبت کاظم اوف
*

2013-11-06

ساری گلین



ساچین اوجون هؤرمزلر
گولو غنچه درمزلر
بو سئودا نه سئودادی 
سنی منه وئرمزلر  
نئینیم آمان آمان
آس ساری گلین
بو دره نین اوزونو
چوبان قایتار قوزونو
نه اولا بیر گون گؤرم
نازلی یاریمین اوزونو
نئینیم آمان آمان
ساری گلین
*
اوخویان : پریسا ارسلانی
*

گول آچدی



گول آچدی باهار اولدو
یار مندن کنار اولدو
من یاردان آیریلالی
اوره ییم غبار اولدو
گولوم نازیله نازیله باخما
منی یاندیریب یاخما
گول آچدی خندان اولدو
درمه دیم دن دن اولدو
من سندن آیریلمازدیم
آیریلیق سنن اولدو
نازیله نازیله باخما 
منی یاندیریب یاخما 
*
اوخویان : پریسا ارسلانی
*

چکدیلر دار



عزیزیم گونده دارا
آچ ساچین گونده دارا  
بلبلو گولدن اؤتور
چکدیلر باغدا دارا  
آپاردیلار گولومو
ائیله دیلر ظولومو
نه قویدولار دانیشام
نه کسدیلر دیلیمی
عزیزیم گونده دارا
آچ ساچین گونده دارا  
بلبلو گولدن اؤتور
چکدیلر باغدا دارا
اووچو وورما مارالی
داغدا گزه ر یارالی
فلکه نئینه میشم
سالدی سندن آرالی
عزیزیم گونده دارا
آچ ساچین گونده دارا  
بلبلو گولدن اؤتور
چکدیلر باغدا دارا
دریادا گه میم قالدی
اکمه دیم زه میم قالدی
آرزون گؤزونده قالسین
نئجه کی منیم قالدی
عزیزیم گونده دارا
آچ ساچین گونده دارا  
بلبلو گولدن اؤتور
چکدیلر باغدا دارا
*
اوخویان : حسین آیدین سس
*
<$BlogPageTitle$> - <$BlogDescription$>" /> < <$BlogMetaData$>