بیزیم ائلین نغمه لری

 ملان

عکسیوی وئر منه مدال ائیلییم
اوّل کی سئوگیمه جاواب ائیلییم
قالدیم ایکی یولدا آخی بس نئینییم
*
بیر دونوم وار چین – چینی
نئینیرم من سئوگینی
الیمده توتموشام
تبریز گؤورچینی
*
قره کت – شالوارین لکه سین آللام
او قارا گؤزلرین قاداسین آللام
سن گئتسن من نئجه تک یالقیز قاللام
*
دیب قاپینی دؤورلر
قارا قیزی سئوه رلر
اوغلان دوشمه دالیمجان
مزاحیمی دؤورلر
*
گولوستان باغینین گؤلونده سیم وار
ملان نان سوروشدوم ائویزده کیم وار
ائوی خلوت ائیله سنه سؤزوم وار
*
قارا باشیوی هؤروم
گلیم قاپیوی گودوم
هامی سئویر یارینی
من ده ملانی سؤووم
*
داغلاردا مئشه لرده
می قالدی شیشه لرده
هامینین یاری گلدی
منیم کی کوچه لرده
*
دیب قاپی دربندده دی
قیزیل گول پیوندده دی
ملانا سؤز دئمیون
سئوگی سی غربت ده دی
*
ساماوار آلمیشام شیری اؤزوندن
سنی چوخ ایسته رم ایکی گؤزومدن
کوسمه گلناز گؤزل یاریم سؤزومدن
*
میز اوسته نار قویموشام
آغلامیشام دویموشام
سیز آللاه قینامیون
ملان نان آیریلمیشام
*
دستبندیم قیزیل دی مدالیم الماس
فامیل فامیل اولسا قیز ائوده قالماز
گئدر او گؤزل لیک سنه ده قالماز
*
میز اوسته ایپک خالچا
کیم قاتییا کیم اچا
قوربانام او سئوگیه
گولدوره گؤیلوم آچا
*
اوخویان: اعظم جمالی
*