قارا قیز

گول آغاجی دئییله م ، هر گلنه اییله م
چک الینی ایلمدن ، من سئوگیلین دئییله م
سنه نئجه عرض ائیلییم ، قیزیل گولم من
آش قوللارین سار بوینوما ، سئوگیلینم من
الیمده الی یاریم ، اولموشام دلی یاریم
بو گونوم بؤیله کئچدی ، ساباحی گلیر یاریم
سنه نئجه عرض ائییلیم ، قیزیل گولم من
آش قوللارین سار بوینوما ، سئوگیلینم من
فلکین بیر بئله دوورو اولاجاقمیش ، نه بیلیم
سارالیب باغ گولوستان سولاجاقمیش ، نه بیلیم
بیتیلیب باغ قالیب بیر نئچه گوللر یئتیریب
اوجالیب دست قضا ، کیم یولاجاقمیش ، نه بیلیم
بسله دیم زولفو دئدیم باشیما سالسین سایه
دولانیب بوینوما ایلان تک چالاجاقمیش ، نه بیلیم
عاشقه ناز ائله مک عادت اولوب معشوقه
بو قدر ناز ائلییب ، جان آلاجاقمیش ، نه بیلیم
دؤنده ریب روزگار حالیمی بیر باشقا حالا
ای قارا داغلی سنه غم قالاجاقمیش ، نه بیلیم
بلبل لر سوزه ر باغی
یار گلر گزه ر باغی
جاملین گول غنچه سی
آچیب دا بئزه ر باغی
تئللرینی یان دارا قیز
ائیله دردیمه چارا قیز
آی قاشی گؤزو قارا قیز
گل ائیله درده چارا قیز
یار زولفونو تؤک اوزه
قربانام آلا گؤزه
دونن دئدین گلمه دین
بوگون باری گل بیزه
تئللرینی یان دارا قیز
ائیله دردیمه چارا قیز
آی قاشی گؤزو قارا قیز
گل ائیله درده چارا قیز
من عاشقم حالینا
اوزده قارا خالینا
لاله بنؤوشه یئتمز
یارین گول جمالینا
تئللرینی یان دارا قیز
ائیله دردیمه چارا قیز
آی قاشی گؤزو قارا قیز
گل ائیله درده چارا قیز

*

اوخویان : ملک خانیم ایوب اوا

*

دولانارام باشینا

مارال قاچار داغ اوسته
بلبل اوچار باغ اوسته
نییه مندن کوسورسن
داغ چکیرسن داغ اوسته
گئتمه گئتمه مارالیم
نه کی دردین وار آلیم
گؤزلرینه باخماسام
گؤزلریمدن سارالیم
سئو کی سئوه ن مرد اولار
سئومیین نامرد اولار
بلبل ده گول باغیندا
بیرجه گوله بند اولار
سئوگیلینی قیناما
اینانیرسان سیناما
دولانارام باشینا
اؤزگه سینه اینانما
سنه کؤنول باغلادیم
چایلار کیمی چاغلادیم
من سنی بیر دویغو تک
اوره ییمده ساخلادیم
قوشا خالین زیل قارا
کیپلیکین ده میل قارا
اینانماسان عشقیمه
آند ایچرم ایلقارا
سئو کی سئوه ن مرد اولار
سئومیین نامرد اولار
بلبل ده گول باغیندا
بیرجه گوله بند اولار
اوخویان : ملک خانیم ایوب اوا