لال منی

شاعر: یعقوب احمدوند ( آیریلماز )
اوخویان: عاشیق محمّد فرزانگان 

*
سحر سحر یول اوستونده ناغافیل
بیر آلا گؤز مارال ائتدی آل منی
آتدی یانا یاناغیننان اؤرپه‌یین
سیر ائله‌دی آغ اوزونده خال منی
یاز گولو تک شافاقلاندی اوزوموز
قلبیمیزده عصیان ائتدی سؤزوموز
بیر بیریلن دانیشیردی گؤزوموز
باخیشیننان قاندیم دئییر: آل منی
دئدیم: دیل آچ گؤزونده‌کین دیلده ده
بم‌ده دئمه، هارای چکیب زیلده ده
 گل دولاناق ائل آراسین ائلده ده
مست ائله‌سین دوداغیندا بال منی
بیردن بیره اؤرپه‌یینی باغلادی
مکتوب یازیب وئردی منه آغلادی
آیریلمازین اوره‌یینی داغلادی
گؤردوم یازیب حق یارادیب لال منی
*