یاتیبدی

نام شاعر : آیریلماز

بیر گون یولوم دوشدو مزارستانا

ائله حس ائیله دیم دوران یاتیبدی

گؤردوم انسان لاری سس سیز سمیرسیز

بیلدیم درد قورتاریب درمان یاتیبدی

سؤیکه دیم بیر داشا ناتوان دیزی

زیارت ائیله دیم آخیر اؤومیزی

گؤردوم دار قبیرده ظالیم چنگیزی 

ائیلییب دونیانی ویران یاتیبدی

ایسته دیم قاییدام ایاق دایاندی

باخدیم بیر قبیره اوره ییم یاندی

دونیانی ترک ائدیب بیر آز زماندی

یار وصلین گؤرمه میش جاوان یاتیبدی

هیرس دن دیشلریم بیر بیرین یئدی

گؤزوم گاه آغلادی گاه گولومسه دی

داشین اوستونده کی یازیلار دئدی

شاعر آستا یئری انسان یاتیبدی

ال قانا بویادی دیشیم دوداغی

هر نه دن چتین دی اولاد فراغی

گؤردوم بیر قبیرده خیردا اوشاغی

آناسیننان اوزاق گریان یاتیبدی

اویما بو دونیانین پیس مرامینا

دونیا سلیمانلار دچکمیش کامینا

یولچو طعنه وورور شاه مقامینا

آقادان یوخاری چوبان یاتیبدی

اوردا هیتلر دوروب جنایت ائتمز

یولداش یولداشینا خیانت ائتمز

یوخسوللوق بیر کسی خجالت ائتمز

توپراق ایچره هامی یکسان یاتیبدی

توپراق لار آلتیندا ارییب بدن

گلمه ییم ندن دیر گئتمه ییم ندن

بیریسی تاپمییب اوش قاریش کفن

قارانلیق مکاندا عریان یاتیبدی

اوردا نه جلاد وار نه دار آغاجی

قارداشین تانیماز اوردا خان باجی

دؤنوب یار یارینا باخماز قئیقاجی

اداسیز عشوه سیز جئیران یاتیبدی

اوردا درک ائتمه دیم پاییزی یازی

بیر یئرده قویلانیب اوغروینان قاضی

توپراغ آلتدا گؤردوم من آیریلمازی

گلیب گئتمه یینه حئیران یاتیب دی
*
اوخویان : عاشیق ممد فرزانه

*

سویوقدور

من سانیردیم چیل اولاجاق آرزولار
آلدادیرمیش منی یانلیش دویغولار
او منی قلبیمدن ووردو
دوردو اوره ییم دوردو
ده ییشیر فصیل لر ، یامان قورخورام
اوه اوه اوه ، سویوقدور
بیر اوجاق یاندیردیم ، ایسینار بدنیم
یوخ یوخ یوخ ، سویوقدور
ده ییشیر فصیل لر ، یامان قورخورام
اوه اوه اوه ، سویوقدور
گئتمیسن تنهایام اوشویوربدنیم
چوخ چوخ چوخ ، سویوخدور
ایسته ییرم آیرلیغی محو ائدیم
یئتمیر گوجوم اولانلاری عفوائدیم
او منی قلبیمدن ووردو
دوردو اوره ییم دوردو
Söz musiqi: Namiq Qaracuxurlu

بو محبت - نامیق قاراچوخورلو

بو نه درددیر نه مصیبت دیر نه بلادیر چکیرم
اوزولور اومودلریم تک عجله گؤز تیکیرم
بیزیم عشق باغچامیزین گوللری سولدو ابدی
آچماییب گؤزلریمین یاشینی هر گون تؤکورم
*
باخیرام جوانلارا هامی گولور ، هامی دانیشیر
دوغرودان ماراقلی دیر حیات قاینییر قاریشیر
اما من جوانلیقیمی سئوگیمه قربان وئریرم
قارا ساچلار آغاریر ، بئل بوکولور ، اوز قیریشیر
*

قالیب او اللرینین ایزلری منده
قالیب او بال دیلینین سؤزلری منده
سنین هئچ یادینا دوشمه ییب او محبت ایندی
قالیب او ، اودون آلاوین کؤزلری منده
*
گؤره سن خئیری ندیر من بو قدر آه ائدیرم
بو فانی دونیانی درد اوجاغینا بنزه دیرم

بو اوجاغین دا توسکوسو کؤر ائدیپ دی گؤزلریمی
ایری آدیملاریلا اوچوروما دوغرو گئدیرم
*
ائیله بیر حالدایام کی ، دوشونورم چتین دوزه لیم
یوخ هئچ کیمین گوناهی ، اؤزومو ییخیبدیر اؤز الیم
اصلینده آیریلیغی ایسته میردیک هئچ بیریمیز
آللاهین قیسمتی دیر ، قاچماق اولماییر گؤزلیم
*
قالیب او اللرینین ایزلری منده
قالیب او بال دیلینین سؤزلری منده
سنین هئچ یادینا دوشمه ییب او محبت ایندی
قالیب او ، اودون آلاوین کؤزلری منده
*
هارا گئتسم هارا باخسام هارا سالسام دا نظر
یئنه او گول جمالین گؤزلریمین اؤنون بئزر
دوشوننده بو خیال دیر سن اؤزون اوزاقداسان
آخیر بو گؤزلریمین یاشی اولور بحر خزر
*
نه ایچون منه بو قدر ظلم ائیلییر چرخ فلک
من ملک ساندیغیمدان آخیر گلدی منه کلک
ایستی بیر یای گئجه سیدی او منی ترک ائیله دی
غفلتن یاغدی یاغیش قوپدو طوفان اسدی کولک

*
قالیب او اللرینین ایزلری منده
قالیب او بال دیلینین سؤزلری منده
سنین هئچ یادینا دوشمه ییب او محبت ایندی
قالیب او ، اودون آلاوین کؤزلری منده
*


Söz musiqi: Namiq Qaracuxurlu

یار بیزه قوناق گله جک

پیاله لر ایرف ده دی
هر بیری بیر طرف ده دی
گؤرمه میشم بیر هفته دی
یار بیزه قوناق گله جک بالام
بیلمیرم نه واخ گله جک
بلکه ده ساباح گله جک
قارا زولفون چک هر یانا
گؤزلرین اوخشار جئیرانا
باخدیم قالدیم یانا – یانا
یار بیزه قوناق گله جک بالام
بیلمیرم نه واخ گله جک
بلکه ده ساباح گله جک
ساماوار اود سالمیشام
ایستیکانا قند سالمیشام
یاریم گئدیب تک قالمیشام
یار بیزه قوناق گله جک بالام
بیلمیرم نه واخ گله جک
بلکه ده ساباح گله جک
نه گزیرسن یارالی یاریم
جانیم گؤزلرین قوربانی
اول کی محبت هانی
یار بیزه قوناق گله جک بالام
بیلمیرم نه واخ گله جک
بلکه ده  ساباح گله جک

*
اوخویان : ثریا قاچار