بو گؤزله نئجه یوخ دئییم آللاه

قارادی ساچلاری بئلی دیر اینجه
آلمادی یاناغی دوداغی قونچه
یئریشی دوروشو لاپ اوره ییم جه
بو گؤزلی نئجه سئومه ییم آللاه
جانیمی بس نئجه وئرمه ییم آللاه
 سئویلمک هر کسین پایینا دوشوب
عمرون پاییزینا یاینا دوشوب
بو جانان دا منیم پاییما دوشوب
بو اوغلانا نئجه یوخ دئییم آللاه
کؤنلومو بس نئجه وئرمه ییم آللاه
بو یاز باخیشیما دولوب او گؤزلر
باغلاییب الیمی قولومو گؤزل
حسرتله اوتوروب یولومو گؤزلر
بو گؤزلی نئجه سئومه ییم آللاه
جانیمی بس نئجه وئره ییم آللاه 
گولوشو دردیمه درماندیر آخی
باخیشی عمرومه فرماندیر آخی
اونسوز کؤنلوم ائوی ویران دیر آخی
بو اوغلانا نئجه یوخ دئییم آللاه
کؤنلومو بس نئجه وئرمه ییم آللاه
گونوز گونشیم دی گئجه آییم دی
بارلی باهاریمدی هم ده یاییم دی
تانری دان بختیمه گلن پاییم دی
بو گؤزلی نئجه سئومه ییم آللاه
جانیمی بس نئجه وئرمه ییم آللاه
 قامتی کؤتنلومو درده سالیبدی
خوش سؤزلری منی مندن آلیبدی
خئییر دووام او تانری یا قالیبدی
بو اوغلانا نئجه یوخ دئییم آللاه
کؤنلومو بس نئجه وئرمه ییم اللاه
*
اوخویانلار : تئللی بورجالی - افلاطون قباد اوغلو

*