بایاتی لار
یاندیریب یاخدی منی
داغ – داشا چاخدی منی
مرد بیلیب آرخالاندیم
نامرددیر ییخدی منی
*
داغلار داغلادی منی
زولفون باغلادی منی
نامردین بلاسیندان
ائللر آغلادی منی
*
داغلار باتیبدی قارا
اووچو دوشوبدو دارا
اوزووه گولن دوستون
قاییت بیر قلبین آرا
*
داغ باشین چن آلارمی؟
آلسا کؤلگه سالارمی ؟
بیر مظلومون قیصاصی
بیر نامردده قالارمی ؟
*
عزیزینم دوست آشی
دوست چؤره یی دوست آشی
دشمنین گول له سیندن
یامان اولار دوست داشی
*
عزیزیم آتار منی
هر درده قاتار منی
نامرد گلیب مرد اولماز
دوسلوقدا ساتار منی
*
عزیزیم داغا گلیر
بولبوللر باغا گلیر
نامردین قایداسی دیر
جان وئرن چاغا گلیر
*
عزیزیم دالداسینا
غونچه گول دالداسینا
نامرد ائله نامرددیر
اؤزو نه ، دالداسی نه
*
عزیزینم آی باتدی
اولدوز باتدی آی باتدی
یاریم بی وفا چیخدی
منی اغیارا ساتدی
*
یا ربیم درده منی
سالما بو درده منی
نامرده محتاج ائتمه
کس قربان مرده منی
*
باغیندا وار آلچالار
یاشیل چالار ، آل چالار
آغلاما دلی کؤنلوم
دشمن گؤروب ال چالار
*
سن منی کول ائیله دین
دردیمی بول ائیله دین
داغیتدین ائل – طایفامی
دشمنه قول ائیله دین
*
عزیزیم آیران سیزا
آیران وئر آیران سیزا
ظلم ائوی اباد اولماز
قالماز بو دووران سیزه
