آتا ماهنی سی - بیر گؤزل موغام

ائل آراسیندا وارمیش بئیله بیر روایت
قولاق آساین ائیله ییرم حکایت
بیر کیشی یاشارمیش یوخسول موش یامان
یوخسوللوق الیندن ائیلرمیش آمات
اوغلونون اولارکن بیر ایکی یاشی
دونیادان گئتمیشدی حیات یولداشی
خئیلی چتین لیک له اوغول بؤیوتدو
عذابا قاتلاشدی بئلی بوکولدو
اوغلو یئتگین حالا یئتیشن زامان
کیشی آرزوسونا یئتیشدی گومان
اوغلو نیشانلادی گؤزل بیر قیزا
قوناقلیق ائتدی کی گلمه سین گؤزه
اوغلونا توی ائدیب گلین گتیردی
آتالیق بورجونو یئرینه یئتیردی
او گوندن سئوینجی آشیب داشیردی
ائله بیل یئنی دن جاوانلاشیردی
خئیلی واخ گئچه رک گلین گلندن
کیشی قوجالاراق لاپ دوشدو الدن
آرتیق قوجا دوشدو پیس وضعیته
گلین تابلاشمادی بو اذیته
آخیرکی ذاتینی وئردی بروزه
بیر گونده اریله گلدی اوز اوزه
دئدی بیل کی بو ائوده آتان
منی بئزیکدیریب اؤزوده یامان
سن اونو بو ائودن اوزاق آتماسان
داها بیرده منی گؤرمویه جکسن
اوغلان گلین دن ائشیذجک بوسؤزلری
تیتره دی اللری اسدی دیزلری
دئدی بیر فیکیرلش دئدیکلرینی
آتا اوره گینده بیلدیکلرینی
منی بویا باشا چاتدیریب آتام
اوناگؤره می دیر من اونو آتام؟
اونون زحمتینی ایتیرسم اگر
قیسمتیم اولمازمی غم غصه کدر؟
گلین حکمتلره اوزو آق گولدو
چتینلیک چکمه دن وئردی حکمونو
دئدی یاخشی - یاخشی فیکیرلش اوغلان
بو ائوده من قالیم یاداکی آتان
اوغلان پیس بلایه اولموشدو دوچار
چوخ فیکره گئده رک قالاراق ناچار
قوجا یاتاغینا او اوزون توتدو
آتا زحمتینی تئز اونوتدوردو
گلیر دوردو آتاسینین یانیندا
قوجا اوزانمیشدی اؤز یاتاغیندا
اوغلان احوالاتی دانیشدی اونا
یازیق اینانا بیمدی اوغلونا
بو سؤزلری دئییر جگرپاره سی
سوسماقدان سووایی یوخدو چاره سی
حیط ده واریمیش کوهنه بیر سبت
طالعینه یازیلمیشدی بو البت
اوغلو آتاسینی سبته سالدی
سونرادا قالدیریب چینینه آلدی
اونلار اوز قویدولار مئشه یه طرف
یام یاشیل گؤروندو مئشه هر طرف
مئشه کناریندا واریمیش بیر دره
گلیب چاتدیلار آتا اوغول همن یئره
سبت دن قوجانی او یئره قویدو
چوخ اوغوللار وارکی بئله نان کوردو
اوغلان گئری دؤنوب قاییدان زامان
آتاسی سویله دی بالام بیر دایان
سنه بئله سی سؤزوم وار آی اوغلوم
ای منیم قانادیم ای منیم قولوم
منی گتیردیین بو سبت کی وار
بیر گون گلری سنین ده لازیمین اولار
بیر واخ سنین ده اوغلون اولاجاق
اونادا بو سبت لازیم اولاجاق
چونکی بو سبت ده بیر واخلار من ده
گوناه ایشله تمیشم اؤز گئنج لییم ده
اویموشام یالان سؤزلره اویموشام فیتنه یه
آتامی منده آتمیشام باخ بوردا دره یه
بو سؤزدن ائله بیل آییلدی اوغلان
توتدوغو بو ایشدن اولدو پشیمان
آتانی گؤتوردو ائوه قاییتدی
سئوگی محبتی گؤزوندن آتدی
آتادیر آنادیر بیزلره پناه
اونلارا درد اولماق گوناهدیر گوناه
اونلارین قدرینی بیلمه لییک بیز
آتادیر آنادیر هر شئی دن عزیز
عزیزیم اوغول گرک
باغچادا نوغول گرک
آتاسینین قدرینی
بیلسین هر اوغول گرک
اوخویان : بال اوغلان

*