آنامیزین گل چهره سی سولوبدور
ننه میزین گؤزو یاشلا دولوبدور
بیرده گؤردون قیزین گلین اولوبدور
قاییت آتا بو ائو سنی ایسته ییر
حسرتیله آنام سنی گؤزله ییر
بو اجاغین دوغماسی یوخ ، یادی یوخ
سن گئدلی سفره میزین دادی یوخ
عؤمور کئچیر غریبلیغین آدی یوخ
قاییت آتا بو ائو سنی ایسته ییر
حسرتیله نوه ن سنی گؤزله ییر
سن سیز لییه آتا نئجه دؤزوم ، گل
ائل آراسی کئچمیر داها سؤزوم گل
پول پارانی ایسته میریک اؤزون گل
قاییت آتا بو ائو سنی ایسته ییر
حسرتیله باجیم سنی گؤزله ییر
قاپیمیزی نه دؤین وار نه آچان
بو حیه تده نه دوران وار نه قاچان
سوروشورلار آتان گلیر بس هاچان ؟
قاییت آتا بو ائو سنی ایسته ییر
حسرتیله آنام سنی گؤزله ییر
*
بیلیرسن کی آتا کیم دیر عزیزیم؟
سن اونو آتاسیز اولاندان سوروش
کؤرپه یاشلاریندان بوینو نو بوکوب
هر پئییه تامارزی قالاندان ئسوروش
اینینه بیر نیمداش پالتار گئیه نده
تاپدیغی تیکه نی خلوت یئیه نده
کیمسه آتاسینا آتا دئینده
گؤزلری بولود تک سولاندان سوروش
یعقوب اوغلو بیر گون آغلییان گولر
آتاسیز بؤیوین گؤز یاشین سیلر
آتانین یئرینی کیم وئره بیلر؟
سن اونو اؤز دوغما بالاندان سوروش
* اوخویان : کؤنول خاسی اوا
*
No comments:
Post a Comment